गणिका अजामेळे काय साधन केलें । नामचि उच्चारिलें स्वभावता ॥१॥

नवले हें पाहा नवल हें पाहा । अनुभवें अनुभवा देहामाजी ॥२॥

उच्चारितां नाम वैकुंठींचें घेणें । ऐसें दुजें पेणें आहे कोठें ॥३॥

ब्रह्महत्या जयासी घडल्या अपार । वाल्हा तो साचार उद्धरिला ॥४॥

उफराटें नाम न येचि मुखासी । मारा मारा ध्यासीं स्मरतां झाला ॥५॥

चोखा म्हणे ऐसा नामाचा महिमा । उद्धारा अधमा स्‍त्री शुद्रा ॥६॥

comments powered by Disqus