संत बहिणाबाईचे अभंग

वत्साचिये माय कपिला सांगातें । धांवे एकचित्तें आम्हांपुढें ॥ १ ॥

मायबाप बंधु भ्रतारासहित । इंद्रायणी जेथ तेथें आलों ॥ २ ॥

करोनीया स्नान पांडुरंगभेटी । आनंदली सृष्टी अंतरंगें ॥ ३ ॥

तुकोबा आरती करीत होते तेथ । नमस्कारें स्वस्थ चित्त केलें ॥ ४ ॥

स्वप्नीं जो देखिला तेंच ध्यान तेथें । देखिलें नेमस्त पूर्ण दृष्टी ॥ ५ ॥

बहिणी म्हणे तेथ भ्रतारें साष्टांग । केला अंतरंग भावयुक्त ॥ ६ ॥

comments powered by Disqus