श्रीगणेशाय नम: ॥ अच्युताच्युत हरे परमात्मन् राम कृष्ण पुरुषोत्तम विष्णो ।

वासुदेव भगवन्ननिरुद्ध श्रीपते शमय दु:खमशेषम् ॥ १ ॥

विश्वमंगल विभो जगदीश नंदनंदन नृसिंहनरेन्द्र । मुक्तिदायक मुकुंद मुरारे श्रीपते शमय दु:खमशेषम् ॥ २ ॥

रामचंद्र रघुनायक देव दीननाथ दुरितक्षयकारिन् । यादवेन्द्र यदुभूषण यज्ञ श्रीमते शमय दु:खमशेषम् ॥ ३ ॥

देवकीतनय दु:खदवाग्ने राधिकारमण रम्यसुमूर्ते । दु:खमोचन दयार्णव नाथ श्रीपते शमय दु:खमशेषम् ॥ ४ ॥

गोपिकावदनचंद्रचकोर नित्य निर्गुण निरंजन जिष्णो । पूर्णरूप जयशंकर शर्व श्रीपते शमय दु:खमशेषम् ॥ ५ ॥

गोकुलेश गिरिधारणधीर यामुनाच्छतटखेलनवीर । नारदादिमुनिवंदितपाद श्रीपते शमय दु:खमशेषम् ॥ ६ ॥

द्वारकाधिप दुरंतगुणाब्धे प्राणनाथ परिपूर्ण भवारे । ज्ञानगम्यगुणसागरब्रह्मन् श्रीपते शमय दु:खमशेषम् ॥ ७ ॥

दुष्टनिर्दलन देवदयालो पद्मनाभधरणीधर धर्मिन् । रावणांतक रमेश मुरारे श्रीपते शमय दु:खमशेषम् ॥ ८ ॥

अच्युताष्टकमिदं रमणीयं निर्मितं भवभयं विनिहंतुम् । य: पठेद्विषयवृत्तिनिवृत्तिजन्मदु:खमखिलं स जहाति ॥ ९ ॥

इति श्रीशंकराचार्यविरचितमच्युताष्टकस्तोत्रं समाप्तम् ॥