उठोनि ब्राम्हीं मुहूर्ती । चिंतन करावी गुरुमूर्ती ॥
भवपाशा होईल शांती । स्वानंदस्थिती निजबोधें ॥१॥
सगुण निर्गुण ध्यान । एकाग्र करावें चिंतन ॥
आत्माराम परिपूर्ण । सुख निधान स्वानंदें ॥२॥
बरवीं पादतळीं लक्षुनी । ध्वज अंकुश वज्रादि चिन्हें ॥
पद्म उर्ध्व रेखा चरणीं । चिदघनीं विराजित ॥३॥
ऐसी पादपद्मा पासुनी । अययवमस्तक पर्यंत मनीं ॥
ध्यावी गुरुमूर्ती अनुदिनीं । आनंदखनी शोभतसे ॥४॥
वरदहस्त मस्तकीं धरुनी । कृपां आठवावी मनीं ॥
उपाधी निरसुनी । ब्रम्हानंदीं सुख व्हावें ॥५॥
पिंडा ब्रम्हांडाचा नाश । करुनि व्हावें पै निर्दोष ॥
हेचि गुरुकृपा विशेष । श्रीगुरुभक्त शोभती ॥६॥
गुरु नाम गुरु ध्यान । गुरु परब्रम्हा निधान ॥
गुरू परिपूर्ण चिद‌घन । श्रीगुरु राम विराजित ॥७॥
ऐशा निदिध्यासें करुनी । मनोनाश होय चिदघनीं ॥
मग कृतकृत्य हौनी । साक्षात्कारीं असावें ॥८॥
निर्गुण निर्विकार । अनिर्वाच्य सुखसार ॥
जीवन्मुक्त पैलपार । श्रीगुरुभक्त शोभती ॥९॥
स्वयें प्रसन्न श्रीगुरुराज । आनंदमूर्ती पादरज ॥
रूळे अखंड सहज । कृतकृत्य पै झाले ॥१०॥