श्रीएकनाथी भागवत
एकनाथ महाराज Updated: 15 April 2021 07:30 IST

श्रीएकनाथी भागवत : श्लोक १७ व १८ वा

ज्ञानेश्वरीतील उणीव एकनाथी भागवताने भरून काढली.

श्लोक १६ वा   श्लोक १९ वा

श्रद्धयोपाहृतं प्रेष्ठं, भक्तेन मम वार्यपि ॥१७॥

भूर्यप्यभक्तोपहृतं, न मे तोषाय कल्पते ।

गन्धो धूपः सुमनसो, दीपोऽन्नाद्यं च किं पुनः ॥१८॥

माझ्या ठायीं अतिप्रीतीं । श्रद्धायुक्त अनन्य भक्तीं ।

भक्त ’भावें’ जळ अर्पिती । तेणें मी श्रीपति सुखावें ॥४९॥

तो जळबिंदु यथासुखें । म्यां मुखीं झेलिजे आदिपुरुखें ।

तंव भक्तभावाचेनि हरिखें । मी सुखरुप सुखें सुखावें देख ॥१५०॥

माझें त्रैलोक्यासी सुख । ऐसा मीही सुखरुप देख ।

त्या मज होय परम संतोख । भाविकांचें उदक सेवितां ॥५१॥

त्या जळबिंदूचिया साठीं । रमा नावडे गोमटी ।

ब्रह्मा जन्मला माझे पोटीं । तोही शेवटीं नावडे ॥५२॥

भाविकांचेनि उदकलेखें । मज वैकुंठही जालें फिकें ।

शेषशयनींचीं निद्रासुखें । त्यांचींही तुकें उतरलीं ॥५३॥

भाविकांच्या उदकापुढें । मज आणिक कांहीं नावडे ।

तेथही गंधादि पूजा जोडे । नैवेद्य चोखडे रसयुक्त ॥५४॥

ते पूजेचिये सुखप्राप्ती । उपमा नाहीं त्रिजगतीं ।

ऐसा भाविकांचिये भक्तीं । मी श्रीपती सुखावें ॥५५॥

भावें करितां भगवद्भक्ती । ’मी कृतकृत्य झालों निश्चितीं’ ।

ऐशिया निश्चयें जो भावार्थी । त्याचेनि जळें संतृप्ति मज होय ॥५६॥

येर जो अभक्त दंभस्थितीं । जीवीं द्रव्याशा बाह्य विभक्ती ।

लौकिकप्रतिष्ठेपुरती । माझी भक्ति जो मिरवी ॥५७॥

ऐशिया अभक्ताचिया स्थितीं । छत्र चामर गजसंपत्ती ।

मज अर्पितांही अभक्तीं । सुखलेश चित्तीं उपजेना ॥५८॥

क्षीरसागर निवडी राजहंस । तेथ निसूं दीधला कापुस ।

तेवीं अभक्तभजनीं संतोष । मी हृषीकेश पावेना ॥५९॥

कागाची गायनकळा । जेवीं तोषेना किन्नर शाळा ।

तेवीं अभक्ताची भजनलीला । माझी चित्कळा तोषेना ॥१६०॥

जेवीं रजस्वलेचें । पक्वान्न । उत्तम परी तें अतिहीन ।

तेवीं अभक्तांचें भजन । कदा जनार्दन स्पर्शेना ॥६१॥

ज्या भजना नातळे नारायण । ऐसें जें अभक्तांचें भजन ।

तेणें भजनें जनार्दन । अणुमात्र जाण तोषेना ॥६२॥

एवं भक्ताभक्तभजनमार्ग । दावूनि अधिकाराचे भाग ।

आतां समूळ पूजामार्ग । साङग श्रीकृष्ण सांगत ॥६३॥

. . .